SÍMON

Hér á eftir fylgir uppskrift að gulrótarköku sem vakti nokkra lukku á Schelling síðustu helgi. Uppskriftinni er stolið úr skoskri kokkabók.

Innihald:
175 g hveiti
3/4 teskeið lyftiduft
3/4 teskeið matarsódi
3/4 teskeið kanill
3/4 teskeið salt
Rétt tæplega 300 ml sólblómaolía
350 g sykur
3 stór egg
225 g rifnar hráar gulrætur

Krem:
175 g rjómaostur
175 g smjör
225 g flórsykur
1/2 tsk vanilludropar

Aðferð:

Sigtið saman þurrefnin. Setjið olíuna í skál, bætið við sykri og þeytið með rafmagnsþeytara. Bætið við eggjum, einu og einu í senn og þeytið vel eftir hvert. Hrærið þurrefnum varlega saman við og bætið svo loks rifnu gulrótinni út í.

Bakið í 25 cm hringformi við 180°C í 45 mín, lækkið svo hitann í 170°C og bakið í aðrar 20 mín eða þar til ekkert deig loðir við hnífsblað sem stungið er í miðja kökuna. Þegar kakan er bökuð takið hana úr ofninum, leyfið henni að kólna í 5 mín í forminu, takið hana svo varlega úr því og leyfið að kólna alveg.

Nú má taka til við kremið. Þeytið saman smjör og rjómaost og sigtið svo smám saman flórsykurinn saman við. Þeytið vel saman og bætið vanilludropunum út í. Skerið kökuna í tvennt og smyrjið helmingnum af kreminu í miðjuna og hinum helmingnum ofan á.

Það tók Indriða og Brynjar innan við hálftíma að klára mest alla kökuna (reyndar með smá aðstoð) en þetta er það má þá alltaf bara baka meira.

Eftirfarandi er uppskrift að rísottó með myntu, að hætti meistarakokksins Finnboga Óskarssonar:

6 skalottulaukar, fínt saxaðir
2 hvítlauksrif, pressuð
50 g smjör
200 g arboríogrjón
safi úr einni sítrónu
1/2 L grænmetissoð, ég nota tening
börkur af einni sítrónu
handfylli af myntulaufum, gróft skorin
70 g parmesan, rifinn
1-2 msk af matreiðslurjóma
svartur pipar og maldonsalt

Laukur og hvítlaukur látin svitna í smjörinu í ca. 5 mínútur. Þá er grjónunum bætt út í og hrært í ca. 1 mínútu. Því næst er sítrónusafinn settur út í og hrært þar til hann er allur gufaður upp. Ein ausa af soðinu því næst sett út í og hrært þar til það er allt gufað upp. Þá næsta ausa og þannig koll af kolli þar til grjónin eru al dente (15-20 mínútur). Ágætt er að pipra á miðri leið. Þá er sítrónuberkinum, myntunni, ostinum og rjómanum bætt út í og hrært í 1-2 mínútur. Smakkað til með salti og pipar og látið standa í 1-2 mínútur áður en þetta er borið fram með rifnum parmesan og meiri myntu.

Þessi skammtur einn og sér dugar ágætlega fyrir tvo. Ítalskt Pinot Grigio smellpassar með þessu, og einnig er gott að marinera kjúklingabringur í sítrónusafa, myntu og svörtum pipar og borða með rísottóinu.

Vegna fjölda áskoranna hefur SÍMON ákveðið að hafa uppskriftahorn á heimasíðunni. Hér verður því hægt að nálgast brot af því besta sem meðlimir SÍMON-ar eru að elda dags daglega.

Fyrsta uppskriftin er Fylltar kjúklingabringur á pastabeði. Ég er ekki alveg viss um hvaðan hún er stolin, en um leið og ég finn heimildirnar mun ég setja þær inn.

Fyrir 4 (þ.e. c.a. 2-3 félaga í SÍMON)
1 msk. ólífuolía
2 hvítlauksgeirar, saxaðir
8 sólþurrkaðir tómatar, saxaðir
150 g parmesanostur, rifinn
400 g Philadelphia rjómaostur
Maldon-salt og nýmalaður pipar
3 lúkur spínat
4 kjúklingabringur
8 sneiðar Ali-beikon
tannstönglar
400 g tagliatelle
4 msk. ólífuolía
2 lúkur steinselja, söxuð

Hitið ofninn í 180°C. Steikið hvítlaukinn í ólífuolíunni, bætið spínatinu við og steikið áfram í 3 mínútur. Kælið. Blandið sólþurrkuðu tómötunum, parmesanostinum og rjómaostinum saman og kryddið með salti og pipar.
Blandið spínatinu saman við. Skerið djúpan skurð í hliðina á hverri kjúklingabringu og fyllið hann með rjómaostsblöndu. Vefjið beikoni utan um og vestið það með tannstönglum. Eldið bringurnar í ofninum í 30 mínútur, eða þangað til bringan er ekki lengur hrá í miðjunni.
Sjóðið pastað í saltvatni samkvæmt leiðbeiningum á umbúðum. Sigtið vatnið frá pastanu, veltið því upp úr ólífuolíu og steinselju og skiptið því á fjóra diska. Leggið kjúklingabringu ofan á og berið fram.

Gott er að bera fram blandað salat með ólífuolíu og balsamic ediki.

Með þessu fara svo um það bil 2 lítrar af kældum Augustiner bjór á mann.

Njótið.